Николоски: Условите на „Рајан ер“ се невозможни за македонскиот пазар

Компанијата барала субвенции од 25 евра по седиште

Министерот за транспорт Александар Николоски изјави дека условите што ги побарал нискобуџетниот авиопревозник „Рајан ер“ за влез на македонскиот пазар се неприфатливи и невозможни за реализација.

Според него, компанијата побарала субвенција од 25 евра по седиште, што е значително повеќе од субвенциите што државата во моментов ги обезбедува за авиокомпаниите.

„Не мислам дека е добро решение за македонскиот пазар затоа што условите што ги поставуваат се невозможни. Ние во моментов даваме субвенции 9 евра за скопскиот аеродром и 12 евра за охридскиот аеродром, што се едни од повисоките субвенции што би можеле да ги најдете на пазарот и не случајно 28 нови дестинации се отворени за помалку од две години откако е избрана оваа влада“, рече Николоски.

Барале приоритет и укинување на дел од дестинациите

Николоски посочи дека барањата на компанијата вклучувале и дополнителни услови поврзани со работењето на аеродромите.

„Како што кажа, барањето на „Рајан ер“ е 25 евра субвенција по седиште, што е повеќе од 2,5 пати за скопскиот аеродром, приоритетно да се опслужуваат нивните аеродроми, да не се користат никакви услуги на скопскиот и охридскиот аеродром, а компанијата има дури и сопствени скали во авионите.“

Тој додаде дека компанијата побарала и укинување на дел од постојните линии.

„Барањето е да ги откажеме и дел од дестинациите кои што ги имаме“, рече Николоски, кој денеска присуствуваше на отворање на градски пазар во Виница.