Судскиот спор меѓу Хали Бери и нејзиниот поранешен сопруг Оливие Мартинез доби нов пресврт. Во најновите судски документи, Мартинез тврди дека нивниот 13-годишен син Мачео сака пред судија да раскаже што се случило за време на наводниот инцидент на 26 септември, по кој Бери е обвинета за физичко насилство.
„Треба да има можност да се слушне неговиот глас за она што го доживеал таа вечер“, навел Мартинез во документите до кои дошол магазинот „Пипл“. Тој рекол дека се плаши оти, ако на момчето не му биде дозволено да зборува пред судот, тоа во иднина би можело да се обесхрабри да пријави проблеми или евентуално насилство.
Мартинез тврди и дека Мачео се плаши оти никој нема да му поверува. Според него, момчето и претходно им се жалело на терапевти за однесувањето на мајка му, но сметало дека неговите поплаки биле минимизирани или не биле сфатени сериозно.
На почетокот на октомври Мартинез побарал самостојно старателство над синот, обвинувајќи ја Бери дека го нападнала на 26 септември. Според неговата верзија, таа го фатила момчето за вратот и го давела за време на расправија. Тој навел и дека имало други случаи на наводно насилно однесување во претходните години. Овие тврдења засега не се потврдени пред суд.
Бери категорично ги отфрлила обвинувањата. Во судска изјава навела дека никогаш физички, емоционално или на кој било друг начин не го малтретирала синот.
„Јас сум жртва на семејно насилство и им помагам на жртвите на семејно насилство. Не сум личност што врши насилство. Никогаш не би му наштетила на нашето дете“, изјавила Бери.
Нејзината адвокатка Марина Бек ги нарекла обвинувањата на Мартинез неосновани и намерно наведувачки. Таа истакнала дека актерката нема да се откаже од борбата за добросостојбата на синот.
Во спорот се вклучила и 18-годишната Нала, ќерката на Бери од врската со поранешниот партнер Габриел Обри. Во изјава пред судот, таа застанала во одбрана на мајка си и ја опишала како грижлив и посветен родител.
„Никогаш не сум видела мајка ми да го удира, да го дави, грубо да го зграпчува или на кој било начин физички да го малтретира Мачео“, навела Нала. Додала дека никогаш не била сведок на однесување што би наликувало на обвинувањата против нејзината мајка.
Бери и Мартинез се венчале во 2013 година, а разводот бил окончан во 2023 година, по долгогодишни несогласувања. Тогаш се договориле за заедничко старателство над синот. Судот сега повторно треба да одлучува за нивните родителски права, а засега не е познато дали Мачео ќе сведочи.