Во средното училиште СУГС „Владо Тасевски“ во Скопје воведена е нова образовна квалификација за специјалист за мехатроника на камиони и тешки товарни возила. Првата група составена од 15 учесници денеска официјално ја започна својата стручна обука.

Според информациите од Министерството за образование и наука, станува збор за програма специјално наменета за стекнување стручни и практични вештини во област за која постои исклучително зголемена побарувачка на пазарот на трудот.

Програмата е развиена преку заедничка соработка на Министерството за образование и наука, Агенцијата за вработување, училиштето СУГС „Владо Тасевски“, Кралството Шведска, компанијата „Волво Груп“ и швајцарската организација „Хелветас“, со јасна цел за обезбедување кадар со знаења и компетенции целосно усогласени со потребите на современата индустрија.

Државната секретарка во Министерството за образование и наука, Елена Ивановска, нагласи дека оваа програма претставува уште еден значаен чекор во јакнењето на средното стручно образование и неговото директно поврзување со реалниот сектор.

„Средното стручно образование е една од нашите силни страни, а со вакви иницијативи го правиме образовниот систем уште посилен, пофункционален и поефективен. Особено е значајно што учесниците ќе имаат можност да добијат практична обука со поддршка на компанија од светски ранг во автомобилската индустрија. Очекувам оваа група да прерасне во квалитетен и конкурентен стручен кадар, подготвен да одговори на потребите на компаниите и пазарот на труд“, истакна Ивановска.

Таа исто така изрази очекување новата програма во иднина да прерасне во формална образовна квалификација и да стане редовен дел од образовниот систем во државата.

Министерството за образование и наука, во соработка со Центарот за развој на стручното образование и Бирото за развој на образованието, активно ќе работи на подготовка на детална наставна програма и соодветни учебници, како и на обезбедување дополнителна современа опрема за изведување на практичната настава доколку за тоа се покаже потреба.

Од ресорното министерство посочуваат дека воведувањето на оваа нова квалификација претставува одличен пример за партнерство меѓу образовните институции, бизнис-заедницата и меѓународните организации при создавањето програми што ја зголемуваат вработливоста и даваат директен придонес за развојот на економијата.