АХК Македонија во соработка со Германското друштво за меѓународна соработка денеска организира информативен настан посветен на новата законска рамка за ангажирање лица за сезонска, привремена и повремена работа, како и промоција на новата дигитална платформа за електронско пријавување и одјавување работници.

Како што е најавено од организаторите, главната цел на настанот е компаниите и работодавачите одблиску да се запознаат со новите законски решенија и практичната примена на дигиталниот систем. Новиот модел овозможува значително поедноставно, побрзо и правно сигурно ангажирање на работната сила, целосно приспособено на тековните потреби на стопанството.

Во рамките на настанот предвидена е детална презентација на усвоените законски одредби, по што ќе следи практична демонстрација на функционалностите на дигиталната платформа пред присутните претставници на бизнис-заедницата.