Во јавноста е објавена фотографија од 61-годишниот државјанин на Србија кој беше повреден во драматичниот инцидент на летот на „Рајанер“ од Солун кон Германија.
Мажот се наоѓа на лекување во Универзитетската болница АХЕПА во Солун, каде лекарите ја следат неговата здравствена состојба и го утврдуваат степенот на повредите.
Прозорецот се одвоил за време на летот
Инцидентот се случил кратко по полетувањето од солунскиот аеродром „Македонија“, кога еден од прозорците на авионот се одвоил за време на летот.
Поради ненадејната декомпресија, главата и рамената на српскиот патник се нашле надвор од авионот, додека присутните патници се обидувале да го задржат и да го вратат во кабината.
Сопругата и патниците му помогнале
Според информациите објавени во медиумите, сопругата го држела повредениот маж за нозете, а потоа во спасувањето се вклучиле и други патници.
Безбедносниот појас дополнително спречил тој целосно да испадне низ отворот. По драматичната борба, патниците успеале да го повлечат назад во авионот.
Авионот безбедно се вратил во Солун
По инцидентот, авионот се вратил на аеродромот во Солун и безбедно слетал. Повредениот српски државјанин веднаш бил преземен од екипа на Итната медицинска помош и пренесен во болницата АХЕПА.
Според досега објавените информации, тој бил свесен и не се наоѓал во животна опасност, а лекарите продолжиле со потребните медицински прегледи.