Општина Аеродром изрече казна од 6.000 евра за локал заради прекумерна бучава.
Угостителски објект санкциониран за нарушување на јавниот ред
Општина Аеродром изрече и наплати парична казна од 6.000 евра на правно лице кое го надминало максимално дозволеното ниво на бучава.
При извршено мерење од страна на општинските инспектори, било утврдено дека еден од угостителските објекти на територијата на Општина Аеродром генерирал прекумерна бучава, со што го нарушил јавниот ред и го вознемирил населението.
Митески: Инспекторите се на терен
Првиот човек на општина Аеродром, Дејан Митески ги соопшти деталите.
Општината апелира на почитување на прописите
- „Според член 50 став 1 од Законот за заштита од бучава во животната средина, нивото на бучава при вршење на угостителска дејност мора да остане во рамките на дозволените граници. Апелираме до сите правни и физички лица да се придржуваат кон пропишаните правила и регулативи, со цел да се избегнат нарушувања на јавниот ред и мир. Истовремено, со тоа би се избегнале ситуации во кои ќе бидеме принудени да изрекуваме прекршочни санкции“, порачаа од Општина Аеродром.
Инспекциските служби со засилени контроли
Од општината информираат дека инспекторите постојано вршат контроли на терен, а секое утврдено прекршување на законите ќе биде санкционирано со парична глоба.
- „Ги повикуваме жителите на Општина Аеродром, доколку забележат какво било несовесно и непримерно однесување, веднаш да го пријават кај нашите служби“, апелираат од локалната самоуправа.