Според црногорската влада, вакцинациите биле организирани на 140 локации низ целата земја. Досега 40.000 лица или околу 7 проценти од населението се вакцинирани со една доза во Црна Гора, додека половина од тој број примиле две дози од вакцината.

Министерката за здравство Јелена Боровиниќ Бојовиќ објасни дека Црногорците ќе можат да избираат помеѓу достапните вакцини, додека на оние кои страдаат од хронични болести, матичен лекар ќе им препорача вакцина.

– Нема да има одложување на масовната вакцинација. Секој жител на Црна Гора кој сака да се вакцинира ќе може да го стори тоа на местото за вакцинација во нивната општина, рече Боровиниќ Бојовиќ.

Досега во Црна Гора се користеле руски и кинески вакцини, како и 24.000 дози вакцини АстраЗенека, што биле купени преку програмата Ковакс.

Комесарот на ЕУ за проширување и соседска политика Оливер Вархеји ќе ја посети Подгорица во текот на денот, а со него ќе пристигнат во Црна Гора првите дози на БиоНТех / Фајзер, кои се дел од донацијата од 651 000 дози што ЕУ планира да ги испорача на земјите од Западен Балкан меѓу почетокот на мај и крајот на август. Вакцините се финансирани од пакет од 70 милиони евра усвоен од Европската комисија во декември 2020 година за да се покријат трошоците за вакцини, дадени во договорите за набавка на ЕУ за партнери од Западен Балкан преку системот Ковакс.

Во истата прилика, Вархеји во понеделникот беше во Србија, а денеска, покрај Црна Гора, ги посети и Босна и Херцеговина и Македонија, а потоа во среда и Албанија и Косово.

Во понеделникот, за прв пат од почетокот на годината, Црна Гора имала помалку од 100 нови случаи на коронавирус на дневно ниво. Бројот на активни случаи опаднал откако здравствените власти наметнаа строги епидемиолошки мерки во средината на март, затворајќи ги образовните институции, рестораните, спортските сали и фитнес и трговските центри.

Ваквите мерки, кои важеа помалку од пет недели, дадоа резултати, така што бројот на активни случаи на инфекција се намали од околу 10 илјади на нешто повеќе од две илјади пациенти.

Во втората половина на април, Црна Гора речиси го нормализира животот со ублажување на скоро сите епидемиолошки мерки, оставајќи ја обврската за носење заштитни маски на отворено и во затворено, забрана за собирање и полициски час од полноќ до 5 часот наутро.