Обвинетиот се соочува со казна затвор до 20 години

ОЈО Скопје поднесе обвинителен акт против едно лице за тешки дела против безбедноста на луѓето и имотот во сообраќајот. Претходно беше целосно спроведена истражната постапка за трагичната сообраќајна несреќа во која загина младата Фросина Кулакова.

Според собраните докази, обвинетиот, без возачка дозвола, на 29 јануари, управувал „Пежо 207“ под дејство на алкохол. Со брзина речиси двојно над дозволената. Тој поминал на црвено светло на семафорот на булевар „Партизански одреди“ и улицата „29-ти Ноември“. Ја удрил Фросина Кулакова, која легално поминувала на обележан пешачки премин.

ТАТКОТО НА ФРОСИНА: Нема да дозволиме политички некрофили и глодари како „Кој е следен“ да ја злоупотребуваат трагедијата на нашето семејство

Од силниот удар, младата девојка се здобила со тешки повреди и починала на самото место.

Јавниот обвинител бара продолжување на притворот

Обвинителството побара продолжување на притворот за обвинетиот, со образложение дека постои ризик од бегство и можност за повторување на делото. Врз основа на сериозноста на кривичното дело, возраста на обвинетиот и околностите на несреќата, судот треба да одлучи за натамошниот тек на процесот.

Обвинетиот се соочува со максимална казна затвор до 20 години, а судењето ќе ја утврди неговата вина и одговорност за овој страшен сообраќаен инцидент.