Музичкиот фестивал „Егзит“ во јули 2027 година повторно ќе ја собере публиката на Петроварадинската тврдина во Нови Сад. Оваа одлука доаѓа откако годинава, за првпат по цели 25 години постоење, манифестацијата не се одржа на својата традиционална фестивалска локација.
Организаторите потврдија дека одлучиле да го забрзаат терминот за враќање поради огромниот интерес на фестивалската публика, која испраќала пораки и отворено барала враќање порано од првично најавеното. Претходната намера била големото враќање да се случи во 2028 година, со оглед на тоа што организациските подготовки за настан од вакви размери траат најмалку 18 месеци.
„Иако големото враќање на Егзит е планирано за 2028 година, веќе следниот јули повторно се собираме на Тврдината за да ги прославиме слободата, единството и љубовта, со посебно искуство на Егзит, чии детали наскоро ќе ги откриеме“, објавија организаторите.
Тие во своето обраќање истакнаа дека забрзаното враќање го поврзуваат со храброста, решителноста и истрајноста на студентите во Србија, потсетувајќи на претходната најава дека фестивалот ќе се врати во државата тогаш кога повторно ќе има услови за слобода. Овогодишното фестивалско издание на „Егзит“ се реализираше на повеќе светски дестинации во рамките на специјална меѓународна турнеја што опфати локации во Малта, Хрватска, Македонија и Египет. Тогашната одлука за напуштање на традиционалниот простор беше поврзана со политичкиот притисок и поддршката кон студентските протести во Србија.
Во оваа фаза сè уште не се објавени точните датуми, фестивалската програма и имињата на изведувачите за специјалното издание во јули 2027 година. Организаторите најавија дека сите дополнителни детали наскоро ќе бидат презентирани пред јавноста.