Македонската ракометна репрезентација претрпе пораз на гостувањето во Халкида од Грција со 29:24 во дуелот од второто коло од квалификациската група за Европското првенство. Македонскиот тим одигра слабо прво полувреме во кое противникот ги искористи своите шанси и на пауза замина со висока предност од 16:9.
На почетокот на вториот дел домаќините поведоа и со девет гола разлика (19:10), но македонските ракометари успеаја да намалат на 19:13. Во финишот на средбата домашната селекција повторно стигна до висока предност од 28:19 и 29:20, но со серија од 4-0 во последните минути македонскиот состав ја ублажи разликата за конечни 29:24.
Михаил Статис во редовите на Грција и Филип Кузмановски во македонскиот табор беа најефикасни на теренот, постигнувајќи по 7 погодоци. Голманите Петрос Буковинас кај Грција и Мартин Томовски на македонската мрежа забележаа по 11 успешни одбрани.
На вториот натпревар од истата квалификациска група, селекцијата на Шведска убедливо славеше на гостински терен против Луксембург со резултат 50:20.
По ова коло, Шведска се наоѓа на првото место во групата со максимални 4 бодови, македонските ракометари имаат 2 бода, колку што има и второпласираната Грција, додека Луксембург останува на последната позиција без освоен бод.
Следниот квалификациски предизвик за македонската репрезентација ќе биде на домашен терен против фаворитот Шведска, натпревар што е закажан за 10 март 2027 година.