Американскиот претседател Доналд Трамп и претставници на Данска и Гренланд денеска потпишаа договор со кој се овозможува проширување на американското воено присуство на Гренланд. Документот беше потпишан во Њујорк, каде што се одржува Генералното собрание на Обединетите нации.
Договорот не го исполнува претходното барање на Трамп Гренланд да стане дел од Соединетите Американски Држави. Наместо тоа, предвидува зголемено присуство на американските воени сили на островот.
Ваквото решение следува откако лидерите на Гренланд се спротивставија на можноста САД да го преземат островот, кој има големо стратешко значење и располага со богати минерални ресурси. Трамп претходно го оправдуваше своето барање со зголеменото присуство на Русија и Кина на Арктикот.
Пред потпишувањето, американскиот претседател во обраќањето пред светските лидери во ОН изјави дека договорот на САД им обезбедува „трајни овластувања над безбедноста и сите други потреби“ на Гренланд.
„На ниту еден противник на САД повеќе никогаш нема да му биде дозволено да воспостави воено присуство на Гренланд, ниту да инвестира во чувствителни сектори без наше изречно писмено одобрение“, изјави Трамп.
По неговото обраќање, договорот го потпишаа и данската премиерка Мете Фредериксен и премиерот на Гренланд, Јенс-Фредерик Нилсен.
Фредериксен го опиша документот како „договор што може да трае засекогаш“. Таа истакна дека со него се потврдува важноста на НАТО и се почитува правото на Гренланд на самоопределување.