Бројот на лица во Белгија кои се долгорочно неспособни за работа поради ментални и нарушувања во однесувањето продолжил да расте и во 2025 година. Најголем пораст е забележан кај случаите поврзани со депресија и синдром на работна исцрпеност, односно прегорување.
Податоците ги објави Националниот институт за здравствено и инвалидско осигурување. Според статистиката, во периодот од 2021 до 2025 година бројот на лица признати како неспособни за работа поради ментални или нарушувања во однесувањето се зголемил за 24,8 проценти.
Кај лицата со депресија и работна исцрпеност, зголемувањето во истиот период изнесува 32 проценти.
До 31 декември 2025 година, психолошко нарушување имале 38,3 проценти од сите лица кои биле неспособни за работа повеќе од една година. Тоа претставува зголемување од 5,2 проценти во однос на претходната година.
Од овие случаи, кај 70,4 проценти била дијагностицирана депресија или синдром на прегорување.
Кај самовработените лица исто така е регистриран значителен пораст. Бројот на самовработени кои биле неспособни за работа поради депресија или прегорување во периодот од 2024 до 2025 година се зголемил за 12,8 проценти – од 7.731 на 8.720 лица.
На подолг рок, односно во периодот од 2021 до 2025 година, зголемувањето кај самовработените достигнало 65,1 процент.
Повеќе од половина од лицата признати како неспособни за работа поради депресија или прегорување во 2025 година биле на возраст од 50 години или повеќе.
Жените сочинувале повеќе од две третини од регистрираните случаи, иако најголем пораст бил забележан кај мажите.
Според податоците на Националниот институт за здравствено и инвалидско осигурување, не е утврдена значителна разлика во бројот на овие случаи меѓу различните региони во Белгија.