Регулаторната комисија за енергетика, водни услуги и услуги за управување со комунален отпад (РКЕ) донесе одлука за зголемување на малопродажните цени на нафтените деривати, кои од 21 јули 2026 година ќе бидат повисоки во просек за 5,88 отсто.
Новите цени ќе стапат во сила од 00:01 часот, а зголемувањето е резултат на порастот на референтните цени на нафтените деривати на светскиот пазар во однос на претходната пресметка.
Според РКЕ, референтните цени во просек се зголемиле кај бензините за 9,003 отсто, кај дизелот за 14,963 отсто, кај екстра лесното масло за 13,200 отсто, додека кај мазутот зголемувањето изнесува 10,686 отсто.
Курсот на денарот во однос на американскиот долар, според кој се формираат цените со претходната пресметка, во изминатиот период бил понизок за 0,1001 отсто.
Во новата одлука е применета и владината одлука за намалување на износите на акцизите. Акцизата е намалена за еден денар по литар кај бензините ЕУРОСУПЕР БС-95 и ЕУРОСУПЕР БС-98, како и за два денари по литар кај ЕУРОДИЗЕЛ БС (Д-Е V).
Од 21 јули максималните малопродажни цени на горивата ќе изнесуваат:
- ЕУРОСУПЕР БС-95 – 90 денари за литар;
- ЕУРОСУПЕР БС-98 – 92 денари за литар;
- ЕУРОДИЗЕЛ БС (Д-Е V) – 94 денари за литар;
- Екстра лесно масло за домаќинство (ЕЛ-1) – 93 денари за литар;
- Мазут М-1 НС – 45,373 денари за килограм.
Бензините ЕУРОСУПЕР БС-95 и ЕУРОСУПЕР БС-98 поскапуваат за три денари по литар, додека дизел горивото ќе има зголемување од шест денари по литар.
Екстра лесното масло за домаќинство поскапува за седум денари по литар, а цената на мазутот М-1 НС се зголемува за 3,205 денари по килограм.
Од РКЕ појаснуваат дека утврдените цени се максимални, а трговците на големо и мало со нафтени деривати и горива за транспорт можат да ги формираат продажните цени и под овие највисоки утврдени износи.