Киев под силен оган, илјадници граѓани во засолништа

Киев беше цел на еден од најмасовните воздушни напади во последниот период, во кој Русија лансирала стотици ракети и беспилотни летала. Украинските власти соопштија дека нападот предизвикал голем број жртви и сериозни штети низ главниот град, а ситуацијата на терен и понатаму е критична.

Најмалку 25 лица загинаа, а над 90 се повредени во ракетниот и дрон напад кој украинските власти го опишаа како најсмртоносен за Киев годинава. Оштетени се околу 130 објекти, меѓу кои станбени згради, јавни институции и инфраструктура.

Спасувачки екипи трагаат по преживеани, Зеленски се врати во Киев

Според шефот на воената администрација на Киев, Тимур Ткаченко, спасувачките тимови и понатаму извлекуваат преживеани од урнатините, а постои ризик бројот на жртви да расте. На левиот брег на Днепар, во едно од најпогодените подрачја, се извлечени пет тела, додека осум лица се водат како исчезнати.

Претседателот Володимир Зеленски ја прекинал посетата на Ирска и итно се вратил во Киев, каде што ги посетил погодените локации, вклучувајќи и речиси уништена деветкатна станбена зграда. Тој повторно побара побрза испорака на системи за противвоздушна одбрана од западните партнери.

„Доколку нашите партнери навреме ги исполнеа своите обврски, ќе можевме да спасиме повеќе животи и домови“, изјави Зеленски.

Меѓусебни обвинувања и нови удари врз инфраструктура

Украинските воздухопловни сили соопштија дека нападот вклучувал невообичаено голем број балистички ракети, а нивното пресретнување било отежнато поради недостиг на ракети за системите „Патриот“.

Руското Министерство за одбрана соопшти дека цел биле воени објекти, аеродроми и енергетска инфраструктура, како одговор на украински напади со дронови.

Во меѓувреме, украинските власти информираа дека бил погоден индустриски објект во руската област Нижни Новгород, каде што има и една жртва.

Градоначалникот на Киев, Виталиј Кличко, прогласи ден на жалост, додека меѓу погодените објекти се и научни институции со уништена лабораторија.

ЕУ и ОН остро го осудија нападот и најавија нови мерки и засилен притисок врз Москва.