Високата претставничка на Европската Унија за надворешна политика и безбедност Каја Калас упати остри обвинувања кон Вашингтон. Таа истакна дека администрацијата на САД прави континуиран притисок врз Киев за прифаќање капитулација според барањата на Владимир Путин.
За време на своето обраќање пред пратениците во Европскиот парламент во Стразбур, Калас изнесе тврдење дека таквиот американски пристап трае речиси година и половина. Таа додаде дека токму европската цврста поддршка го спречила потклекнувањето на Украина под условите на Кремљ.
„Американските преговарачи речиси две години, поточно година и пол, се обидуваат да ја принудат Украина да се предаде. Украина не се предаде под условите на Путин само затоа што Европа ја поддржуваше“, изјави Калас.
Таа образложи дека физичкото присуство на европските сојузници на преговарачката маса претставува единствен начин да се одржи баланс во однос на чекорите на Белата куќа, оценувајќи дека позициите на Вашингтон премногу се доближуваат до целите на руската страна.
Калас отфрли какви било критики од европратениците дека Унијата нема дефинирано мировна стратегија. Таа посочи дека веќе доставила конкретен документ до европските влади во кој јасно се наведени условите што Русија мора да ги исполни за да се постигне договор.
„Ако Русија ги изнесува своите максималистички барања, и ние мора да ги изнесеме нашите за да воспоставиме рамнотежа во преговорите. Мора да испратиме и јасна порака до Русија: за сè што ја интересира, како што е укинувањето на санкциите, Европа мора да биде на преговарачката маса, бидејќи тоа се европски одлуки“, рече Калас.
„Нема да ги дадеме тие работи бесплатно. Не станува збор само за постигнување мир, туку и за тоа тој да биде траен и праведен“, додаде таа.
Шефицата на европската дипломатија ја критикуваше Москва за воените блокади на Црното Море и манипулацијата со прехранбените ресурси, посочувајќи ги неодамнешните инциденти со руски беспилотни летала во близина на територијалните води на Бугарија и Романија. Таа го осуди и одбивањето на Русија да прифати примирје во енергетскиот сектор пред претстојната зима.
„Украина сака мир повеќе од кој било, бидејќи веќе четири години е под бомбардирање и сега влегува во петтата година. И Европа сака мир. Не е точно дека не го сакаме. Единствената страна што не сака мир е Русија. Да бидеме сосема јасни околу тоа“, нагласи Калас.
Калас останува меѓу најгласните критичари на стратегијата што ја води Доналд Трамп кон Кремљ, откако претходно го оцени договорот за дизелот како непотребен устапок кон Москва. Сепак, Брисел потенцира дека сојузничката координација со САД мора да продолжи за ефикасна заштита на Украина, додека високи европски и британски претставници веќе пристигнаа на средбите во Осло.