На средбата било разговарано за младите, образованието и новите модели на бизнис развој
Претседателката Гордана Сиљановска-Давкова денеска ги прими учесниците во програмата „Конекција Оксфорд“, меѓу кои Џеј Јакуб, извршен директор на Фондацијата за економија на заемноста, предавачот Мајкл Рамзден, како и креаторите на програмата Костаке Милков и Нада Милкова.
На средбата, претседателката посочила дека програмата претставува значајна можност за македонските студенти да добијат пристап до современи истражувања и директно да комуницираат со академски истражувачи од Оксфорд.
Според неа, „Конекција Оксфорд“ претставува важен мост меѓу македонските високообразовни институции и еден од највисоко рангираните универзитети во светот.
Разговарале и за нов пристап во бизнисот
Гостите ја запознале Сиљановска-Давкова со истражување поврзано со основните цели на бизнисот, при што нагласиле дека фокусот не треба да биде само профитот.
Тие посочиле дека суштината на бизнисот е создавање профитабилни решенија за проблемите на луѓето и животната средина, наместо остварување добивка преку создавање нови проблеми.
Во разговорот била образложена и нова метрика на профит која, како што било посочено, треба да обезбеди придобивки за сите учесници во работниот процес, без негативни последици врз вработените и природата.
Програмата постои од 2011 година
Соговорниците ја истакнале и важноста од поголема поддршка за младите, оценувајќи дека токму тие можат да придонесат за позитивни општествени промени.
Програмата „Конекција Оксфорд“ е иницирана од Балканскиот институт за вера и култура во 2011 година.
Во рамки на програмата, досега повеќе од 100 професори, предавачи и докторанди од Оксфорд престојувале во Македонија, каде ги презентирале своите истражувања од областа на физиката, хемијата, медицината, вештачката интелигенција, филозофијата, етиката, книжевноста, бизнисот и историјата.