Во полициската акција „Фјури“, спроведена во албанскиот крајбрежен град Драч, уапсени се македонските државјани Муса Џавит (26) и Сенафи Нуредини (34), кои биле барани со меѓународни потерници на Интерпол.
Заедно со нив бил приведен и 26-годишниот Џенкиз Рушити, осомничен дека им обезбедувал логистичка поддршка и лажни документи за идентификација. Според објавените информации, Џавит и Нуредини се поврзуваат со криминалната група „Беланоца“, позната и како „Барон“.
Акцијата била резултат на повеќемесечна соработка
Приведувањето било извршено по повеќемесечна разузнавачка и полициска соработка меѓу албанската специјална полиција, македонското Министерство за внатрешни работи и Дипломатската служба за безбедност на САД при американските амбасади во Скопје и во Тирана.
Според изворот, акцијата претставува значаен удар врз групата „Беланоца“, со која двајцата осомничени биле поврзувани.
Џавит и Нуредини се осомничени за тешки кривични дела
Муса Џавит, роден во Скопје, повеќе од една година бил во бегство. Тој се поврзува со убиството на 50-годишниот офицер на АРМ, Агим Мухареми, извршено на влезот во скопското село Батинци.
Во текстот се наведува дека Џавит се поврзува и со убиството на Абдил Ибраими во 2023 година. Поради наводното незаконско овозможување тој да го напушта затворот „Шуто Оризари“, кривична пријава претходно добил и поранешниот директор на установата, Филип Андов.
Сенафи Нуредини, роден во Норвешка, е посочен како главен осомничен за вооружениот напад од 12 мај 2021 година во скопската населба Бутел 2. Во нападот бил убиен 43-годишниот Камбер Идризи, додека неговиот 24-годишен внук подоцна починал во болница.
Пронајдени фалсификувани документи
При приведувањето, албанската полиција пронашла фалсификувани пасоши, за кои се сомнева дека уапсените ги користеле за движење преку границите и за прикривање на идентитетот.
Според објавените информации, мрежата за нивно криење ја организирал третиот уапсен, Џенкиз Рушити. Кај него, покрај документите, била пронајдена и дрога.
По апсењето се очекува да биде поведена постапка за екстрадиција на Џавит и Нуредини во Македонија.