Судските вештаци на рочиштето против Миљана и Владимир Кецмановиќ, родителите на малолетниот убиец К.К., изјавија дека момчето кое на 3 мај 2023 година изврши масакр во основното училиште „Владислав Рибникар“ во Белград, би убил уште повеќе соученици доколку во еден момент не доживеал кратко стеснување на свеста.
Кецмановиќ го уби обезбедувачот на училиштето и девет свои соученици, а неколку други рани. Психијатар и психолог сведочеа дека во текот на нападот бил способен да расудува, да ги насочува своите постапки и дека голем дел од она што претходно го испланирал, го реализирал. Вештакот Миодраг Станковиќ нагласи дека малолетникот бил свесен за своето однесување, но дека во еден момент на минување покрај прозорецот почувствувал стеснување на свеста што го спречило да го доврши планот.
Вештаците утврдија и дека К.К. внимателно го подготвувал злосторството, анализирал какви санкции следуваат за масовни убиства, не само во Србија туку и во други земји, затоа што сакал неговото дело да биде „големо и тешко“. Тој однапред испланирал и како да го спаси својот живот со предавање без оружје, кое го фрлил подалеку во дворот. Во исказите пред вештаците признал дека прво го застрелал чуварот, потоа две дежурни ученички и уште едно девојче пред тоалетот.
Анета Лакиќ, уште една од вештак, изјави дека неговото тврдење дека не се сеќава на делови од масакрот е сомнително, бидејќи кога бил прашан за крв, рекол дека не видел, туку само дека „пукал во тела“. Таа додаде дека снимките од камерите во училиштето не покажуваат дека момчето било во паника.
Иако бил свесен за своите постапки, малолетниот К.К. не може да одговара кривично затоа што во моментот на масакрот немал наполнето 14 години. Поради тоа, семејствата на жртвите најавија иницијатива до Министерството за правда за измени на Кривичниот законик и Законот за малолетни сторители на кривични дела и кривична заштита, со кои би се намалила возрасната граница за кривична одговорност од 14 на 12 години.