Американскиот претседател Доналд Трамп објави дека Израел и Либан се договориле за десетдневно примирје, кое треба да стапи во сила денеска во 17 часот по источноамериканско време, односно во 23 часот по централноевропско време.
Во објава на Truth Social, Трамп наведе дека во текот на денот имал „одлични разговори“ со либанскиот претседател Џозеф Аун и израелскиот премиер Бенјамин Нетанјаху.
„Овие двајца лидери се согласија дека, со цел да се постигне мир меѓу нивните земји, официјално ќе започнат десетдневно примирје“, напиша Трамп.
Тој посочи дека претставници на двете земји претходно се сретнале со американскиот државен секретар Марко Рубио во Вашингтон, што било прва средба по повеќе од три децении.
Трамп додаде дека им наложил на потпретседателот Џеј Ди Венс, државниот секретар Марко Рубио и началникот на Здружениот штаб Ден Кејн да работат на постигнување траен мир меѓу двете земји.
„Ми беше чест да решам девет војни низ светот, а ова ќе биде мојата десетта“, изјави Трамп.