Американскиот претседател Доналд Трамп изјави дека САД и Иран се блиску до договор, при што Вашингтон би соработувал со Техеран за преземање и транспорт на збогатениот ураниум во САД.
Во телефонско интервју, Трамп рече дека процесот ќе се одвива постепено и дека американските власти ќе работат директно со Иран на „извлекување“ на материјалот од нуклеарните постројки.
„Ќе го средиме тоа заедно. Ќе влеземе со Иран и ќе го донесеме ураниумот назад во САД“, изјави Трамп.
Тој додаде дека ќе бидат потребни уште разговори за финализирање на договорот, кои најверојатно ќе се одржат за време на викендот, а не ја исклучи можноста и самиот да отпатува во Исламабад.
Според проценките, Иран поседува значителни количини ураниум збогатен до 60 проценти, што е едно од клучните прашања во преговорите меѓу двете земји.
Трамп повтори дека главната цел на САД е да се спречи Иран да развие нуклеарно оружје, додека Техеран тврди дека програмата е исклучиво за цивилни цели.
Во меѓувреме, САД ќе ја задржат поморската блокада сè додека не се постигне конечен договор.
Трамп изјави дека разговорите напредуваат и дека очекува брз исход, додавајќи дека „многу добро се согласуваат“ со Иран.