Лидерот на бугарската политичка партија „Има таков народ“, Слави Трифонов, јавно се огласи по повод инцидентот што се случи во бугарската амбасада во Скопје, при што на 11 јануари беше фрлен камен кон влезната врата на дипломатската мисија.
Инцидентот во амбасадата и реакцијата на властите
Настанот бил регистриран од безбедносните камери на амбасадата, по што сторителот бил уапсен. Македонските власти го оценија случајот како изолиран инцидент и истиот беше јавно осуден.
„Проблемот не е стаклото, туку ставот“
Според Трифонов, суштината на проблемот не е во скршеното стакло, туку во односот и ставот. Тој посочи дека, по правило, луѓето сакаат да го скршат стаклото на оние што не ги сакаат. Во таа насока, потсети дека пред години, при посета на Скопје, во близина на бугарската амбасада видел голем натпис со пораката „Бугари, умрете“, оценувајќи дека од тогаш до денес ништо суштински не се променило.
Порака до македонската јавност
Трифонов се повика и на, како што ја нарече, народната бугарска мудрост: „Со сила, убавина не бива“. Во својата изјава тој порача дека, доколку не постои желба за промена, граѓаните ќе останат во Северна Македонија, ќе се соочуваат со, како што рече, „одвратни црни натписи“, повремено ќе кршат стакла, ќе сонуваат за бугарски пасоши, ќе одат на море во Сончев Брег и ќе ги испраќаат децата да студираат во Бугарија, гледајќи ја Европската Унија „низ искривена леќа“. „Објективно кажано, токму тоа го заслужувате“, истакна Трифонов, пренесе Њуз.бг.