ЦЕНТРАЛНО СОБРАНИЕ НА БЕСА: Партијата се претопува во ВЛЕН, Касами смета дека имаат поголем капацитет од досега прикажаното

Централното собрание на Движење Беса во Тетово

Централното собрание на Движење Беса со мнозинство гласови донесе одлука за распуштање на ова партиско тело, со цел отворање пат за приклучување кон процесот на обединување на повеќе политички партии во рамки на Вреди (ВЛЕН) како единствен политички субјект. Одлуката беше изгласана по час и половина расправа во партиското седиште во Тетово.

Претседателот на партијата, Биљал Касами, изјави дека со овој чекор се отвора простор за структурирање на „Вреди“, согласно мораториумот за партиски активности договорен од субјектите што ја сочинуваат коалицијата. Тој нагласи дека добил овластување да ги продолжи разговорите за иднината на „Вреди“, со поддршка за спојување во еден политички субјект што ќе го почитува принципот на правда и волјата на гласачите и на Албанците.

Касами смета дека имаат поголем капацитет од прикажаното

На состанокот била разгледана и работата на функционерите на Движењето Беса во Владата. Касами информира дека членовите на Собранието ја поддржале неговата оценка оти партијата располага со поголем капацитет од досега реализираното.

Тој посочи дека анализата на работата на функционерите ќе продолжи во наредниот период, а заклучоците ќе се рефлектираат во претстојната реконструкција на Владата. Според него, учеството во извршната власт треба да биде насочено кон поефикасна служба за сите граѓани, особено за Албанците, при што идните одлуки ќе се темелат врз овој принцип.

Отворени прашања за идното лидерство и владината структура

Одговарајќи на прашање дали ќе биде претседател на новата заедничка партија во рамки на коалицијата „Вреди“, Касами рече дека во игра се повеќе опции и дека е подготвен да преземе одговорност доколку заеднички се процени дека тоа е потребно.

Во однос на изјавата на Христијан Мицкоски дека тој е носител на мандатот за составување Влада, Касами нагласи дека се свесни за таа позиција, но дека, сè додека станува збор за политичка влада во која учествува Беса како дел од „Вреди“, партијата ќе одлучува кој ќе биде предложен за министер од нејзина страна. Тој додаде дека ќе се направи оценка на работата на сите функционери, вклучително и на Фатмир Лимани.

Пред почетокот на седницата, Лимани изјави дека за неговата позиција ќе пресуди сработеното во изминатите 16 до 17 месеци, вклучително и реализираните вработувања и проекти. Тој повика на разумност и дејствување што нема да создаде простор за назадување, нагласувајќи дека не треба да се наруши структурата на ВЛЕН и дека процесот треба да се гледа пошироко, а не низ призма на поединец.