Венко Заев знае дека дијаспората нема да гласа за СДС затоа го блокираат Изборниот законик

СДС го блокира законот со амандмани, тврди ВМРО-ДПМНЕ

Од ВМРО-ДПМНЕ обвинуваат дека СДС и Венко Заев го блокираат Изборниот законик со илјадници амандмани, со цел да го отежнат гласањето на дијаспората.

„Стравот на Венко Заев и СДС е едноставен, тие знаат дека дијаспората нема да гласа за нив затоа што тие луѓе си заминаа од државата токму поради нивното катастрофалното раководење“, се наведува во соопштението на партијата.

Од таму додаваат дека блокадите во Собранието се мотивирани од страв од изборен пораз и недоверба кај гласачите во странство.

„Венко Заев и СДС денес панично го блокираат Изборниот законик со илјадници амандмани од една единствена причина, бидејќи стравуваат дека македонската дијаспора нема да им ја даде довербата“, стои во реакцијата.

Обвинувања за владеење, одлив на население и политичка криза

Во соопштението се наведува дека граѓаните ја напуштиле државата поради, како што велат, лошо владеење, криминал и корупција.

„Токму нивното катастрофално владеење, неспособноста, криминалот, корупцијата и понижувањата што и ги нанесоа на државата ги натераа илјадници граѓани да ја напуштат Македонија“, наведуваат од ВМРО-ДПМНЕ.

Според партијата, СДС намерно ја кочи изборната реформа и го попречува остварувањето на правото на глас на иселениците.

„СДС и Венко Заев наместо да покажат минимум одговорност и да овозможат полесно остварување на избирачкото право на иселениците, СДС прави се за да го закочи Изборниот законик“, стои во соопштението.

Анкети, ЕУ пораки и политички пораки пред избори

Од ВМРО-ДПМНЕ посочуваат дека блокадите немаат врска со демократијата, туку со страв од изборен пораз.

„Блокадата на СДС и Левица нема никаква врска со демократијата, туку со стравот од уште поубедлив изборен пораз“, наведуваат од партијата.

Тие се повикуваат и на анкетни резултати, според кои, како што тврдат, ВМРО-ДПМНЕ има значајна предност.

„Доказ дека СДС се плаши од избори е и последната анкета каде ВМРО-ДПМНЕ има повеќе од трипати поголема поддршка од СДС, додека довербата во опозицијата паѓа под 100 илјади гласови“, се наведува во соопштението.

Партијата тврди дека поддршката за СДС е на ниво од 6 проценти и дека се потребни суштински реформи во опозицијата.

Дополнително, од ВМРО-ДПМНЕ наведуваат дека амбасадорот на Европската Унија во земјата, Михалис Рокас, го поздравил предлог-изборниот законик и повикал на политички консензус.

„Единствени кои остануваат на спротивната страна се СДС и Венко Заев, кои повторно ги ставаат партиските интереси пред интересите на државата и граѓаните“, стои во реакцијата.

Од ВМРО-ДПМНЕ оценуваат дека однесувањето на опозицијата ќе има политичка последица на следните избори, кои, според нив, ќе бидат одговор на политиките на блокади и неуспеси.