Хернан Алберто Гил Флорес (44) останал заробен 9 метри под урнатините на паркинг во трговскиот центар „Галеријас Плаја Гранде“ во Ла Гваира, каде што работел како чувар. Денеска тој беше ослободен по повеќедневна спасителна акција на локалните и меѓународните спасувачки екипи.

Сопругата на спасениот маж, Усбимар Гонзалез, изјави за Си-Ен-Ен кратко пред успешното спасување дека ѝ било многу тешко по земјотресот, бидејќи мислела дека нејзиниот сопруг можеби е мртов.

– Но, штом дознав дека е жив, како сонцето да ме осветли. Се однесуваше како херој. Децата го чекаат дома – рече таа.

Снимките објавени вчера, среда, го покажуваат моментот кога спасувачите првпат воспоставиле визуелен контакт со Гил, кој работел како обезбедувач во трговскиот центар. Контактот бил остварен со помош на камера за пребарување вметната во урнатиот подрум на зградата.

Видео објавено од чилеанската противпожарна служба ги прикажува прстите на човекот како мавтаат низ мал отвор помеѓу слоевите дебел бетон и остатоци.

Службите за итни случаи објавија дека комуницирале со Гил и му давале вода, храна и лекови. Течноста му била доставена преку црево и шприц. На објавено видео се гледаат главата и рамената на Гил како штрчат од урнатините. Се гледа како носи маска и има повредено око.

Чилеанската противпожарна служба ја опиша операцијата за спасување како „многу сложена“, бидејќи зградата била нестабилна и тимовите морале да се справат со паѓање на остатоци.

Себастијан Мокоркер од тимот на Обединетите нации за проценка и координација на катастрофи изјави дека 7 дена по земјотресот се можни само чудесни спасувања. Таканаречениот „златен прозорец“ за пронаоѓање преживеани обично трае 3 дена, по што шансите за преживување без извор на вода брзо се намалуваат.

Спасувачите ја добија првата информација дека некој можеби е сè уште жив под урнатините на трговскиот центар „Галеријас Плаја Гранде“ во неделата. Тимовите беа во можност да го потврдат присуството на преживеаниот користејќи радарски сонар и опрема за детекција на звук, соопшти чилеанската противпожарна служба.

Три дена спасувачите и експертите од 6 земји работеа на расчистување безбеден премин низ урнатините и обезбедување животна поддршка за Гил.

„Известуваме дека Хернан Гил е медицински стабилен и во последните часови прими интравенски серум, како и вода и раствори за рехидратација“, објави денеска Црвениот крст на Костарика на Фејсбук.

На едно видео што го сподели претседателот на Салвадор, Наиб Букеле, се гледа како спасувач разговара со Гил и му дава портокалова течност, можеби електролитен пијалок, преку црево додека екипите се подготвувале да го извлечат.

„Дали си повреден?“, се слуша како спасувачот го прашува.

„Не, не сум повреден. Само ми е непријатно со камењата“, одговара тој.

Претседателот Букеле рече дека спасувачката операција била тешка бидејќи тунелот ископан од спасувачите се срушил неколку пати.

– Спасувачките екипи од неколку земји работеа неуморно за да го стабилизираат тунелот, поддржувајќи го, зајакнувајќи го и изолирајќи го, но не беше можно да се одржува – рече тој.

Крајбрежниот град Ла Гваира, каде што беше пронајден Гил, е една од најтешко погодените области во Венецуела по двата силни земјотреси, а спасувачките операции сè уште се во тек.

Луѓето користат копачи, лопати и голи раце, обидувајќи се да се пробијат низ урнатините на високи станбени згради, бидејќи горивото и ресурсите се во недостиг.

Претседателот на Националното собрание, Хорхе Родригез, вчера објави дека најмалку 2.295 лица загинале, што е зголемување од околу 350 во однос на претходниот ден. Сепак, се верува дека вистинскиот број на жртви е многу поголем.