Трагедија при новогодишна забава во Швајцарија

Неколку лица го загубија животот, а повеќе други се повредени во пожар што избувна за време на новогодишна забава во алпски скијачки центар во јужна Швајцарија, соопшти полицијата во четврток. Според првичните неофицијални информации загинати се најмалку 10 лица.

Пожарот избувнал во лаунџ барот во Кран-Монтана

Како што изјави портпаролот на полицијата на кантонот Вале, Гатан Латион, пожарот започнал околу 1:30 часот по полноќ во лаунџ барот „Le Constellation“ во Кран-Монтана. Во моментот на избувнување на пожарот, во објектот имало околу 100 лица.
„Има повеќе повредени и повеќе смртни случаи“, изјави Латион, додавајќи дека причините за пожарот засега не се познати. Според медиумските извештаи, повикувајќи се на полицијата, животот го загубиле дестина лица, но се стравува дека бројката може да расте. Официјална потврда за бројот на жртвите сè уште нема, а има и голем број на повредени, веројатно над 100 лица.

Итните служби на терен, областа затворена

Големи тимови на итните служби веднаш биле испратени на местото на несреќата, а спасувачките операции продолжуваат. Полицијата соопшти дека областа е затворена и е воспоставена зона забранета за летови над Кран-Монтана. Прес-конференција на која ќе присуствуваат полицијата и регионалниот јавен обвинител е најавена за околу 10 часот наутро.

Луксузен туристички центар со меѓународен углед

Кран-Монтана важи за една од најексклузивните локации во Швајцарија, позната по целогодишното сонце благодарение на јужно ориентираната висорамнина во долината на реката Рона. На надморска височина од околу 1.500 метри, оваа област нуди панорамски алпски погледи што се протегаат од Матерхорн до Мон Блан.
Со околу 15.000 жители, Кран-Монтана е препознатлива по својот ненаметлив гламур, луксузни продавници, фини ресторани, пространи скијачки патеки и жива сцена по скијањето, а често ја посетуваат и познати личности.