Навистина е големо задоволство кога ќе се видат завршени проекти, му честитам на градоначалникот, навистина прави одлична работа. Тетово доживува инфраструктурен бум и тоа е за секоја поддршка и за секое поздравување. Улицата „Штипска“ е дел од проектот кој што го работиме заедно со општината и со Светска банка, кажа вицепремиерот и министер за транспорт Александар Николоски при денешната посета на општина Тетово.

Она што со гордост сакам да го кажам дека општина Тетово, само преку програмите кои што одат преку Министерството за транспорт досега има реализирано или реализира проекти од 428 милиони денари што е исклучително добра сума за реализација на инфраструктурни проекти. Но, она што е уште побитно, степенот на реализација е исклучително висок, и ако земам да ги читам сите оние завршени преокти ќе ми треба половина час, рече Николоски.

Вицепремиерот му честиташе на градоначалникот Касами за сработеното. Потенцираше дека ретко која општина во државата може да се пофали со толкав голем број на реализирани проекти, а соработката и поддршката ќе продолжи и во следниот период.

-Веќе поразговаравме за некои следни проекти, а ќе продолжиме тоа да го правиме и во следниот период и заеднички да работиме. Исто така работиме на поширокото инфраструктурно поврзување. Добро оди изградбата на автопатот Тетово – Гостивар, тоа е автопат кој што го започна оваа Влада, решени се сите прашања со експропријација, сега се решаваат прашањата кои се поврзани со дислокација водови, исто така не сакаме да го отсечиме населението од едната ио другата страна на автопатот и затоа се работат натпатниците, односно мостовите. Доколку продолжиме со оваа динамика веќе следната година ќе ги видиме првите завршени километри, а до крајот на 2028 година целосно ќе биде завршен автопатот од Тетово до Гостивар и тоа е нешто на што особено сум горд. Исто така она што сакам да го кажам е заедно со ЕУ во рамките на Планот за раст веќе интензивно работиме на документација за железничко поврзување на Скопје со Тетово и Гостивар во прва фаза со Кичево, Охрид, Струга и Република Албанија, истакна Николоски.