Деловна зграда во Финансискиот кварт „Крал Абдула“ во Ријад, главниот град на Саудиска Арабија, денес беше оштетена од проектил, според еден сведок и три лица запознаени со ситуацијата. Неколку сведоци изјавија за агенцијата AFP дека оштетениот објект е во сопственост на нафтениот гигант „Арамко“ (Aramco).

Ова се случи кратко откако коалицијата предводена од Саудиска Арабија соопшти дека пресретнала проектил истрелан од бунтовничката група Хути во Јемен, која е поврзана со Иран. Од октомври, саудискиот главен град, а особено неговиот аеродром, е честа цел на проиранските борци кои се борат против јеменската влада.

Нападот врз финансискиот кварт би можел да претставува значителна ескалација на конфликтот меѓу Кралството и Хутите. Саудиските сили ги обвинија Хутите дека вчера и завчера извршиле два смртоносни напади врз цивили во Јемен.


„Зградата на ’Арамко‘ дефинитивно беше целта“, изјави еден сведок. Двајца други сведоци потврдија дека виделе оштетувања на објектот.

Се чини дека се оштетени неколку ката, забележа еден сведок, укажувајќи на скршени прозорци и видливи оштетувања на дел од фасадата на зградата. Претходно, коалицијата објави дека пресретнала два балистички проектила истрелани од Хутите кон главниот град, Ријад.

Финансискиот кварт „Крал Абдула“ – со своите импозантни облакодери, луксузни продавници и зелени површини – претставува еден од најистакнатите симболи на економските и социјалните реформи што моментално се спроведуваат во Кралството.

Во оваа област се наоѓаат и станбени згради, како и метро-станица низ која минуваат голем број луѓе за време на шпицот.

Овие напади се случија само неколку часа откако саудиското Министерство за образование вчеравечер објави дека редовната настава со физичко присуство во училиштата во Ријад ќе продолжи, по неколкунеделна настава на далечина – мерка што претходно беше воведена поради еден претходен бран напади.