Американската тајна служба започна истрага по објавувањето на видео поврзано со Иран во кое се споменува првата дама на САД, Меланија Трамп. Снимката најпрво беше емитувана на ирански државен медиум, а потоа почна да се шири и на социјалните мрежи.
Според американските медиуми, видеото содржи упатства за потенцијален напаѓач во кои се наведува „како“ и „каде“ да биде извршен напад врз Меланија Трамп. Во него се изнесуваат и наводни информации за нејзините „слабости“, а снимката завршува со пораката упатена до нејзиниот син: „Бароне, почекај нè“.
Портпаролот на американската Тајна служба, Нејт Херинг, за „The Express US“ изјави дека агенцијата е запознаена со содржината на видеото и дека ги проверува сите информации што би можеле да се протолкуваат како закана за лицата под нејзина заштита.
„Тајната служба е свесна за видеото и истражува сè што може да се сфати како закана за нашите жители. Од причини на оперативна безбедност, не коментираме за прашања поврзани со заштитното разузнавање“, изјави Херинг.
Американските медиуми наведуваат дека видеото содржи закани упатени кон Меланија Трамп, како и информации за нејзините движења и секојдневни навики. Авторите тврдат дека користеле податоци од анонимни извори и сателитски снимки, но според истите извори, најголемиот дел од информациите се засноваат на јавно достапни податоци.
Објавувањето на видеото доаѓа во период на зголемени тензии меѓу Вашингтон и Техеран. Неколку дена претходно, „Њузвик“ објави дека Американската тајна служба истражува уште едно видео поврзано со Иран, кое исто така било насочено кон првата дама.
Во меѓувреме, американските медиуми информираат дека низ Техеран се појавиле билборди со фотографии од претседателот Доналд Трамп и членови на неговото семејство, меѓу кои Меланија Трамп и нивниот син Барон. На нив имало заканувачки пораки со повици за смрт на претседателот и членовите на неговото семејство.