(ВИДЕО) ВЕЛОСИПЕДСКИ КРУГ СО ПОВЕЌЕ ЗАСТАНУВАЊА: Рута Куманово – Гостивар во чест на хероите од Диво Насеље

Меморијален велосипедски круг во чест на хероите од „Диво Насеље“

Со повеќе активности денеска се одбележуваат 11 години од настаните во кумановско „Диво Насеље“, при што во фокусот е меморијалниот велосипедски круг што се одржува утрово. Од 7 часот, група граѓани тргнаа со велосипеди од влезот на Куманово кон Скопје, со крајна дестинација Гостивар.

Рута со повеќе застанувања за оддавање почит

Во текот на патувањето, учесниците застануваат на неколку локации, меѓу кои Студеничани, Камник, Стајковци, Бутел, касарната „Илинден“, касарната „Ѓорче“, Тетово и Брвеница. На овие места им се оддава почит на загинатите припадници на безбедносните сили, на нивните вечни почивалишта.

Настанот се реализира со полициска придружба, а во неговата организација се вклучени повеќе граѓани и организации, меѓу кои „Патриотско друштво“, како и актерот Антонио Ташковски.

Одбележување со цвеќе и порака за незаборав

Претходно, делегации положија свежо цвеќе пред спомен-обележјето во СВР Куманово. Во 28-часовните престрелки на 9 и 10 мај 2015 година животот го загубија осум припадници на безбедносните сили, а 37 лица беа повредени.

Граѓаните порачаа дека настаните од мај 2015 година треба да останат дел од колективната меморија.

МАКЕДОНИЈА НЕ ЗАБОРАВА. ВЕЧНА СЛАВА ЗА ХЕРОИТЕ ОД ДИВО НАСЕЉЕ!