Европската Унија прекрши неколку договори, изјави српската премиерка Ана Брнабиќ по прифаќањето на барањето на Косово за членство во Советот на Европа, пренесува „Еурактив“.
Барањето на Косово во Советот на Европа беше прифатено со 33 од 46 гласови, но српските претставници, меѓу кои и министерот за надворешни работи Ивица Дачиќ, истакнаа дека „нешто што не е држава не може да биде членка на СЕ“.
„Советот на Европа е посебно тело од Европската Унија. Свесни сме за гласањето на Србија против кандидатурата, но фокусирани сме на дијалогот Белград-Приштина“, изјави портпаролот на ЕУ за надворешни работи и безбедносна политика, Петер Стано.
Стано одговараше на прашањето на албанските новинари дали Србија ги прекршила договорите од Брисел и од Охрид кои наведуваат дека Србија нема да се противи на членството на Косово во ниту една меѓународна организација.
„И Србија забележа дека ЕУ уште еднаш директно го прекрши Бриселскиот договор, договорот предложен од ЕУ и Анексот за имплементација од Охрид, Статутот на Советот на Европа, Повелбата на ОН и Резолуцијата 1244“, напиша Брнабиќ на Твитер.
„Патем, ми се допаѓа делот во кој Стано ja забележува „многу едноставната логика“ на преговорите. ‘Секоја страна треба да направи нешто за да добие нешто’. Во реалноста, Приштина доби повеќе од нешто, а не направи апсолутно ништо. Толку од едноставната логика“, заклучи Брнабиќ.
Во меѓувреме, многумина тврдат дека Србија прекршила повеќе делови од други договори поддржани од ЕУ, вклучително и за мешање во странски избори, во врска со неодамнешните локални избори во северно Косово, лобирање против признавањето и членството на Косово во меѓународните организации и гласањето против неговата кандидатура за СЕ.
Двајца експерти од бирото на Парламентарното собрание дополнително ќе ја анализираат понудата на Косово. Тие ќе напишат извештај за Косово и ќе оценат како неговиот судски систем ќе се усогласи со основните принципи на Советот на Европа.
Собранието потоа ќе именува двајца известувачи од Комисијата за политички прашања и демократија и Комисијата за правни прашања и човекови права, кои ќе изготват извештаи што ќе бидат разгледани и изгласани во собранието.