За Македонија секогаш има максимален мотив и желба за резултат“
Македонскиот репрезентативец Јани Атанасов ги изнесе очекувањата пред двата пријателски натпревари на националниот тим против Босна и Херцеговина и Турција.
Тој нагласи дека, иако станува збор за пријателски средби, репрезентативците ќе влезат со максимален пристап и желба за добар резултат.
„Сезоните во нашите клубови завршуваат, полека се собираме и ги насочуваме мислите на овие натпревари. Кога се игра за Македонија секогаш имаме желба и мотив повеќе за добри резултати. Не гледаме дека се работи за пријателски мечеви, сите ќе го дадеме нашиот максимум“, изјави Атанасов.
Македонија со почит кон Босна и Херцеговина
Атанасов истакна дека во составот има нови имиња, но селекторот добро ги познава нивните квалитети и затоа се повикани во репрезентацијата.
Тој додаде дека противникот Босна и Херцеговина е сериозна селекција, особено по добрите настапи во квалификациите.
„Босна прикажа одличен фудбал во квалификациите. Ја елиминираа Италија, тоа доволно говори за нивниот квалитет“, рече тој.
Фокус на победа во Сараево и Истанбул
Македонската репрезентација на 29 мај игра против Босна и Херцеговина во Сараево, а само два дена подоцна ќе се соочи со Турција во Истанбул.
Атанасов нагласи дека тимот ќе оди на надигрување и победа во двата натпревари.