Бизнисменот Стојан Чифлигароски, осомничен во предметот „Синџир“, по три години поминати во бегство повторно влегол во земјава, по што бил лишен од слобода на граничниот премин „Свети Наум“. Од Министерството за внатрешни работи потврдија дека 44-годишниот Чифлигароски од Охрид, со живеалиште во Битола, бил уапсен при влез во државата.
Чифлигароски во земјава влегол со возило на 22 септември преку граничниот премин „Свети Наум“. Полициските службеници го идентификувале како лице по кое се трага и го лишиле од слобода. За него била распишана централна потерница по наредба на Основното јавно обвинителство за гонење на организиран криминал и корупција.
„С.Ч. е лице под истрага и е опфатено со кривична постапка за дела ‘злосторничко здружување’ по член 394, ‘даночно затајување’ по член 279 и ‘перење пари и други приноси од казниво дело’ по член 273 од Кривичниот законик“, соопшти МВР.
Во предметот „Синџир“ се води истрага за организиран криминал, даночни затајувања и перење пари, а Чифлигароски е еден од осомничените опфатени во постапката. Според информациите, тој во државата влегол два дена пред да биде објавена информацијата за неговото апсење.
По лишувањето од слобода, за неговиот понатамошен статус и за натамошното постапување ќе одлучуваат надлежните органи.