Полициски службеници ширум земјата спроведоа опсежни превентивни и едукативни активности насочени кон зголемување на безбедноста на граѓаните и младите. Проектите опфатија теми од сообраќајната безбедност, превенција од кражби, заштита од врсничко насилство и сузбивање на болестите на зависност. Активностите се реализираа на подрачјата на повеќе сектори и одделенија за внатрешни работи.
Полициски службеници од Полициското одделение Чашка и ОВР Неготино во Чашка и Неготино реализираа превентивни активности под мотото „Заштити го својот дом“. Во рамки на овие активности, полициските службеници ги советуваа граѓаните за начините како ефикасно да се заштитат од различни форми на кражби, како соодветно да ги обезбедат своите домови и постојано да внимаваат на личните предмети.
Истовремено, полициски службеници од ОВР Кавадарци и Полициската станица Виница одржаа едукативни предавања во ООУ „Димката Ангелов Габерот“ во село Ваташа, кавадаречко, и во ООУ „Славчо Стојменски“ во Виница. Предавањата беа посветени на заштитата од врсничко и сајбер насилство, при што учениците детално се запознаа со облиците и начините на манифестирање на овие девијантни појави, како и со можните последици. На средбите беа нагласени конкретните методи за навремено превенирање и справување со ваквиот вид девијантно однесување меѓу младите.
Во основното училиште „Даме Груев“ во Битола, припадници на СВР Битола реализираа посебна превентивна активност насочена кон укажување на штетните последици од болестите на зависност. На учениците им беа презентирани соодветните методи и начини што треба да се применуваат со цел успешно превенирање и справување со овие девијантни појави во општеството.
На сообраќаен план, полициски службеници од полициските станици за безбедност на патниот сообраќај од Велес, Кочани и Штип реализираа активности насочени кон возачите и патниците. Посебен акцент беше ставен врз задолжителното користење на сигурносен појас заради зголемување на личната безбедност, како и врз потребата од редовно техничко одржување и исправност на возилата, што претставува клучен услов за безбедно учество во сообраќајот.
По повод 18 октомври, Европскиот ден за борба против трговија со луѓе, службеници од Отсекот за превенција и Отсекот за компјутерски криминал при СВР Велес реализираа активности за запознавање на граѓаните со формите и начините на кои организираните криминални групи ја вршат оваа појава, споделувајќи совети за заштита. На истата тема, полициски службеници од СВР Штип одржаа едукативни предавања за учениците во ООУ „Димитар Влахов“ во Штип, СОУ „Наум Наумовски Борче“ во Пробиштип, како и во основните училишта „Ванчо Прќе“ и „Климент Охридски“ во Делчево.