Црвениот крст на град Скопје им поделија пакетчиња на хоспитализираните деца на Детската клиника
Соработници на тимот за одговор при катастрофи на Црвениот крст на град Скопје денеска се спуштија по јаже од хеликоптер и им поделија пакетчиња на хоспитализираните деца. Дел од нив беа маскирани како Дедо Мраз, а други волонтери како омилени супер херои од цртаните филмови. Настанот е показна вежба насловена „Да подариме насмевка“ во која учествуваше и тимот за спасување на планина како дел од тимот за одговор при катастрофи на Црвениот крст на град Скопје.
Вежбата беше организирана во соработка со Министерството за внатрешни работи и Хеликоптерската единица, со цел да им се обезбеди радост на децата кои моментално примаат болничка нега.
Традиционална новогодишна радост за децата
Директорот на Клиниката за детски болести, Реџеп Мемеди, истакна дека ова е традиционална акција на Црвениот крст на град Скопје:
„Ова е традиционална акција на Црвениот крст на град Скопје во која Дедо Мраз и другите јунаци од детските филмови ги израдуваа децата со новогодишни пакетчиња. Се заблагодарувам на Црвениот крст на град Скопје, чии тимови, како што појаснив, носат радост барем во последните денови од годината на децата кои мораат да останат на болничко лекување.“
Тој додаде:
„Околу 100 деца во моментов добиваат болнички третман и најголем број од нив ќе мора и во деновиве пред Новата година да останат во клиниката поради нивната состојба. Со ваквите акции ја ублажуваме нивната болка и им носиме радост за да ги поминат во поубава атмосфера овие денови.“
Волонтерите носат насмевки од хеликоптер
Арѓенд Чилафи, стручен соработник во тимот за одговор при катастрофи на Црвениот крст на град Скопје, рече дека годинава, по осми пат, акцијата „Да подариме насмевка“ беше присутна на Детската клиника:
„Нема нешто поубаво кога ќе ги видите лицата на децата кои овие предновогодишни денови ќе ги поминат во болничка постела. Им посакувам што побрзо да го напуштат овој објект. Успеавме Дедо Мраз и дел од волонтерите облечени во костуми да ги донесеме со хеликоптер. Нешто ново, нешто различно од изминатите седум години. Се надевам, доколку успее ова да остане традиција, наредната година да смислиме нешто поубаво со цел да израдуваме некое дете.“
Акцијата повторно ги спои традицијата и креативноста на Црвениот крст на град Скопје, донесувајќи насмевки и радост за децата во предновогодишниот период.