Европската комисија најави нови мерки за конкурентност
Единствениот пазар на Европската Унија мора да се прилагоди на современите предизвици, меѓу кои развојот на вештачката интелигенција, климатските политики и геополитичкиот натпревар, порача претседателката на Европската комисија, Урсула фон дер Лајен, во обраќање пред Европскиот парламент.
– „Единствениот пазар останува нашата најефикасна алатка, не само за просперитет, туку и за стратешко влијание. Со 450 милиони луѓе и пазар од 18 трилиони евра, ЕУ има моќ да ги поставува глобалните стандарди“, истакна Фон дер Лајен.
Таа предупреди дека технолошките промени и геополитичкото ривалство ја принудуваат Унијата на модернизација на пазарот.
„ЕУ инк“ и нов акт за чипови
Како еден од првите чекори, Фон дер Лајен ја посочи иницијативата „ЕУ инк“, која предвидува единствен правен систем за отворање компании во рок од 48 часа и за помалку од 100 евра, наместо примената на 27 различни национални системи.
Таа најави и нов „Акт за чипови 2.0“, кој треба да придонесе за технолошкиот суверенитет на Европската Унија.
Различни ставови во Европскиот парламент
За време на дебатата, пратениците од Европската народна партија побараа поедноставување на регулативите, додека социјалдемократите предупредија на растечката сиромаштија.
Пратениците од зелените, пак, ја поврзаа ефикасноста на европскиот пазар со безбедносните предизвици, американската политика, руската агресија и конкурентноста на Кина.