Шеснаесет песни од кариерата на Тоше Проески се обединети на двојното винилно издание „The Very Best of Toše Proeski“, кое го претстави загрепската издавачка куќа Хит Рекордс. Албумот е посветен на музичкото наследство на пејачот и содржи дел од неговите најпознати изведби. Музичкиот избор е придружен со портрети и колаж од приватни и професионални фотографии.
Изданието е замислено како пресек на кариерата на еден од најзначајните музичари од овие простори, чиј глас ја поврзуваше публиката низ регионот. На двете грамофонски плочи се најдоа песни што останаа препознатлив дел од неговиот опус и продолжуваат да ги будат емоциите на слушателите.
Посебно значење објавувањето има за главниот уредник на Хит Рекордс, Мирослав Рус. Покрај авторско-пејачката соработка, него и Тоше ги поврзувало и пријателство. Од нивната заедничка работа произлегоа неколку песни што оставија трага во регионалната музика, меѓу кои и „Игра без граници“, една од најпрепознатливите во кариерата на Проески.
„За мене ова е посебен момент. Да се работи на издание на голем уметник пред сè е чест, а со оглед на нашето пријателство дури и обврска. Не можам да замислам делото на Тоше Проески да остане без албум кој сепак, во презентативна смисла, е вистинска, сериозна трага на еден уметник без граници каков што беше Тоше Проески. Верувам дека ова издание со радост ќе го дочекаат и слушателите, како и сите оние кои на кој било начин придонеле за истото“, истакна Мирослав Рус.
Покрај „Игра без граници“, изборот на ова луксузно двојно LP-издание ги вклучува „Једина“, „Чија си“ и „Боже, брани ја од зла“, како и хитовите „Пратам те“, „Срце није камен“ и „Несаница“. Вкупно шеснаесетте избрани песни претставуваат дел од изведбите што ја одбележаа неговата кариера.
Во претставувањето на албумот се истакнува и придонесот на авторите чии мелодии и стихови го збогатија творештвото на Тоше. Меѓу нив се Миро Буљан, Антонија Шола, Леонтина Вукомановиќ, Ѓорѓе Новковиќ, Марина Туцаковиќ и други соработници што учествуваа во создавањето на неговиот музички опус.
За целокупното визуелно обликување е задолжен дизајнерот Игор Келчец. На предната и на задната страна на изданието се поставени портрети на Проески, додека внатрешноста содржи внимателно составен колаж од фотографии што ги поврзува неговиот професионален пат и приватниот живот.
Фотографскиот избор опфаќа сцени од настапи, но и поинтимни моменти, далеку од сцената и рефлекторите. Преку нив, изданието потсетува на различни периоди и доживувања што ги одбележаа животот и кариерата на пејачот. Спојувањето на јавните настапи со приватните спомени му дава лична димензија на албумот и ја дополнува приказната што ја раскажуваат песните.
За слушателите и колекционерите, двојната плоча ги обединува звукот приспособен на винилниот формат и богатата визуелна содржина. Намерата е музиката да се доживее заедно со фотографиите, кои нудат дополнителен поглед кон Тоше како уметник и како личност.
Објавувањето на „The Very Best of Toše Proeski“ е и потсетување на наследството што остана по неговото прерано заминување. Неговото отсуство остави длабока празнина, но песните продолжуваат да живеат меѓу слушателите. Новото издание овозможува повторно слушање на дел од најпознатите изведби во винилен формат, со препознатливата топлина на звукот и со емоциите и спомените што неговиот глас ги буди и по толку години.
