Водечкиот кандидат на АфД, Улрих Зигмунд, рече дека им подава рака на сите други политички сили, но само на оние кои се подготвени заедно со него да спроведат јасен политички пресврт.

АфД за првпат победи на покраинските избори во Саксонија-Анхалт и, според проекциите, оствари рекорден резултат, додека ЦДУ претрпе голем пораз. Саксонија-Анхалт избра нов покраински парламент.

– Испишавме историја во оваа покраина – изјави водечкиот кандидат на АфД, Улрих Зигмунд, за ARD.

Тој додаде дека им подава рака на сите други политички сили, но само на оние кои се подготвени заедно со него да спроведат јасен политички пресврт.

– Она на што со мене не треба да се смета е откажувањето од сопствените вредности заради доаѓање на власт – рече тој.

Во тој случај, како што рече, не би бил подготвен ниту за коалиција, ниту за малцинска влада. Сега ќе почека за да види како ќе се постават останатите партии.

Копретседателката на АфД, Алис Вајдел, оцени дека станува збор за „историски резултат“.

– Ќе видиме што сè ќе ни донесе оваа вечер – изјави таа за ZDF и нагласи: „Ова е сосема јасен мандат за составување влада.“

Според нејзините зборови, најсилната партија секогаш има мандат да формира влада. АфД е подготвена и за разговори за можни партнери.

– Нашата рака е секогаш испружена – рече Вајдел, додавајќи дека покраинскиот огранок на партијата самостојно ги носи одлуките.

Рекордна излезност 

Излезноста на покраинските избори во Саксонија-Анхалт изнесуваше 80 отсто, според податоците на ZDF.

АфД убедливо победи на покраинските избори во Саксонија-Анхалт. Според проекцијата на ARD, изработена од институтот „Infratest dimap“, партијата освои 44,5 отсто од гласовите. На изборите во 2021 година таа доби 20,8 отсто. Со ова АфД го оствари својот најдобар резултат на покраинските избори досега и стана најсилната политичка сила во покраинскиот парламент.

Далеку зад неа се наоѓа ЦДУ. Партијата на покраинскиот премиер Свен Шулце освои историски ниски 18,5 отсто од гласовите. Ова е голем пад во споредба со покраинските избори во 2021 година, на кои ЦДУ, предводена од долгогодишниот премиер Рајнер Хазелоф, убедливо победи со 37,1 отсто од гласовите.

Според проекцијата, трета по сила е Левица (Die Linke) со 9,5 отсто од гласовите, со што останува под својот досега најлош резултат во Саксонија-Анхалт, кој изнесуваше 11 отсто.

Следат Зелените со девет отсто, пред СПД, која освои осум отсто од гласовите. Со ова и СПД се приближува до својот најлош резултат досега. На изборите во 2021 година таа освои 8,4 отсто.

БСВ (Сојуз Сахра Вагенкнехт) освои пет отсто од гласовите и сè уште стравува за влезот во покраинскиот парламент, додека ФДП, според проекцијата, со два отсто не го помина изборниот праг.

Колку се сигурни проекциите и прогнозите?

Пред објавувањето на првите изборни проекции, институтите за истражување на јавното мислење во Саксонија-Анхалт се наоѓаат под посебна лупа.

Пред пет години, предизборните анкети значително отстапуваа од конечниот резултат: Христијанско-демократската унија (ЦДУ) оствари многу подобар резултат од очекуваниот, додека АфД помина значително полошо.

Роланд Аболд, директор на институтот „Infratest dimap“, изјави за Дојче веле дека институтите за истражување на јавното мислење поради тоа овојпат со посебно внимание ја следеле изборната трка.

– Можеме да кажеме дека пред изборите имаше релативно малку промени во анкетите – рече Аболд.

Според најновите истражувања, АфД има поддршка од околу 40 до 41 отсто од гласачите, додека владејачката ЦДУ е на приближно 22 до 23 отсто. Се очекува во парламентот да влезат и Левица и Социјалдемократската партија на Германија (СПД), додека Зелените се движат околу изборниот праг од пет отсто, неопходен за освојување пратенички мандати.

Аболд рече и дека еден од проблемите воочени на претходните избори, по сè изгледа, сега е помалку изразен:

– Кога станува збор за предизборните анкети, може да се каже дека проблемот со луѓето кои не сакаат да признаат дека намераваат да гласаат за одредени партии всушност стана помал.

1,7 милиони луѓе со право на глас

Право на глас на овие покраински избори имаат сите германски државјани кои наполниле најмалку 18 години и најмалку три месеци имаат пријавено главно живеалиште во Саксонија-Анхалт. Станува збор за речиси 1,7 милиони гласачи.

Тие го избираат Покраинскиот парламент кој има најмалку 83 пратеници, но тој број обично е поголем, на пример доколку се доделуваат дополнителни и компензациски мандати.

Извор: Плусинфо