Избришано милитантно видео на Али Ахмети

Видеото што деновиве беше масовно споделувано од членови и функционери на ДУИ, на кое се прикажува лидерот на партијата, Али Ахмети, облечен во униформа и сцени од воениот конфликт во 2001 година, синоќа е избришано од интернет.

На снимката се слушаа воинствени песни посветени на ОНА и командантот Ахмети, како и фотографии и видеа со негови средби со косовски и албански политичари. Во центарот на видеото беше обраќањето на Ахмети.

  • „Јас потекнувам од народот, од вашите редови. Доверете ми го оружјето, гледајте како го користам. Никогаш не сум изгубил битка, бидејќи војниците ми ја доверија моќта,“ изјави Ахмети во видеото, кое беше отстрането од социјалните мрежи.

ДУИ: „Видео од биографски карактер“

Од ДУИ посочија дека видеото не претставува никаква провокација и дека се работи за претставување на животниот пат на нивниот лидер.

  • „Ова е дел од животната приказна на нашиот претседател, Али Ахмети. Неговиот живот не може да се оспори или побие,“ изјави Рина Ајдари од ДУИ.

Реакции од СДСМ и министерот за внатрешни работи

СДСМ го повика Ахмети да престане со поттикнување етнички тензии и го критикуваше видеото.

  • „Излезете од етноцентричната реторика и престанете со намерните етнички провокации. Тоа е неприфатливо,“ изјавија од СДСМ.

Министерот за внатрешни работи, Панче Тошковски, рече дека видеото е обид за дефокусирање од тековните истраги.

  • „Кога некој има сериозни проблеми и големи одговорности, логично е да се обидува да го пренасочи вниманието. Ова видео е само една од темите што сакаат да ги наметнат, иако тие прашања одамна се затворени во нашето општество,“ изјави Тошковски.

Избришаното видео продолжува да биде предмет на дебата, а реакциите укажуваат на поделби на политичката сцена.