Белгиското Министерство за финансии потврди дека било цел на насочен кибернапад. Поради овој безбедносен инцидент неколку основни онлајн-услуги се привремено недостапни за јавноста, соопштија локалните медиуми.
Како последица на недостапноста на дигиталните сервиси за корисниците, Министерството одлучи да го продолжи за две недели рокот за внесување податоци што првично требало да бидат доставени најдоцна до утре.
Според официјалните информации од надлежното Министерство, при упадот не биле извлечени доверливи податоци од нивните сервери. Хакерите се обиделе да направат промени во самиот софтвер, но нивниот обид бил неуспешен.
Поради потребата од постепено обновување на прекинатите услуги, една по една, како и од спроведување на неопходните претходни технички проверки, надлежните очекуваат проблемите постепено да бидат надминати во следниот период.
Полицијата и Националниот центар за кибербезбедност веќе активно работат на деталната истрага за расчистување на овој напад.