Рамиз Мерко, градоначалникот на Струга, доби ново обвинение само еден ден по судското рочиште за незаконско назначување на директори во четири училишта. Обвинителството го товари за несовесно работење, овој пат поради назначување на вршителка на должноста директорка во основното училиште во селото Радолиште, која не ги исполнувала законските услови.

Незаконско именување на директорка со финансиски последици

Според обвинението, на 12 јануари 2022 година, Мерко ја поставил новата вршителка на должноста директорка, иако таа немала потребно работно искуство од најмалку пет години во воспитно-образовна работа, што е задолжителен услов според Законот за основно образование. Иако не ги исполнувала условите, директорката останала на функцијата до јули 2023 година, при што и биле исплатени плати и придонеси како на лице кое ги исполнува условите, со што е оштетено училиштето.

Мерко пред повеќе судски процеси за незаконски назначувања

Ова не е првпат Мерко да се соочи со правни последици. Против него веќе се водат судски процеси за незаконско назначување на директори во основни училишта во Велешта, Лабуниште, Подгорци, како и во Струга. Неговата одбрана тврди дека дури и ако постојат неправилности, тоа се прекршоци, а не кривични дела.

Обвиненија за луксузно возило и бесправна градба

Освен обвиненијата за образовните установи, Мерко се соочува и со обвинение за незаконска набавка на луксузно возило Audi A6 вредно 67.000 евра, во време кога општинската сметка била блокирана. Дополнително, тој е обвинет и за бесправно градење на објект во близина на хотелот Дрим.

Мерко на „црната листа“ на САД за корупција

Во 2022 година, Стејт департментот на САД го стави Мерко на својата „црна листа“ поради вмешаност во корупција и влијание во судски процеси. По оваа одлука, Обвинителството започна со поднесување на серија обвиненија против него, кои и денес се актуелни.