Интегриран граничен систем стартува овој петок
Од петок, 4 јули, на граничниот премин Табановце–Прешево ќе почне да функционира првиот интегриран граничен премин помеѓу Македонија и Србија, според моделот „One Stop Shop“. Овој систем, кој овозможува контрола само при влез во државата, има за цел значително да го намали метежот и времето на чекање, особено во летниот период на годишни одмори.
Оваа новина доаѓа како резултат на зголемениот број на патници и возила кои ја преминуваат границата во текот на туристичката сезона, што ги натера властите да ја интензивираат соработката со соседните држави.
Заедничка контрола, побрзо поминување
Министерот за внатрешни работи Панче Тошковски најави официјално пуштање на системот:
„Со Србија, официјално ќе го ставиме во функција на крајот од оваа недела, мислам дека во петок договоривме да имаме церемонија на отворање и почеток на функционирање на овој начин на контрола на патници на граница“, изјави Тошковски.
Дополнително, тој откри дека веќе се водат преговори и со Албанија:
„Сме во фаза на интензивни разговори и со Република Албанија, каде разговараме за два гранични премини, каде сметаме дека ќе се олесни движењето на граѓаните преку границите со новиот начин на контрола на патници таканаречен ‘One Stop Shop’“, додаде министерот.
Клучен чекор кон регионална поврзаност
Моделот „One Stop Shop“ подразбира дека граѓаните и товарните возила ќе поминуваат само една гранична контрола – за влез во земјата. Ваквиот пристап веќе се применува во делови од Европската унија и е доказ за зголемена доверба и усогласување меѓу државите.
Според надлежните, ова не само што ќе го забрза сообраќајот, туку и ќе придонесе за подобра безбедност, ефикасност и транспарентност во граничното управување.