Сиљановска-Давкова бара политичарите да не вршат притисок врз Уставниот суд

Претседателката на државата, Гордана Сиљановска-Давкова, повика политичките лидери и партиите да се воздржат од коментари во пресрет на утрешната одлука на Уставниот суд за Законот за јазиците. Таа побара од политичарите да дозволат Уставниот суд да одлучува самостојно, во согласност со Уставот и Деловникот за работа.

  • „Одлуките на Уставниот суд се дефинитивни и задолжителни за спроведување. Затоа, политичките лидери и партиите треба да се воздржат од коментари кои се субјективни, лични или партиски. Најмалку што можат да направат е да му дозволат на Уставниот суд да работи во согласност со Уставот и Деловникот“, изјави Гордана Сиљановска-Давкова.

Изјавата на Сиљановска-Давкова е реакција на изјавите на лидерот на ДУИ, Али Ахмети, во пресрет на одлуката на Уставниот суд поврзана со Законот за употреба на јазиците.

Утре Уставниот суд ќе расправа за Законот за јазиците

Седницата на Уставниот суд за разгледување на Законот за употреба на јазиците е закажана за утре. На оваа седница судиите ќе расправаат за уставноста на законот, кој во минатото предизвика бројни политички и правни дискусии.

Премиерот: Процедурата на Уставниот суд може да трае со месеци или години

Премиерот ги повика граѓаните да не наседнуваат на провокациите од ДУИ и потенцираше дека не треба да се очекуваат драматични настани на утрешната седница на Уставниот суд.

  • „Судскиот процес е долг и сложен. Најпрво, судијата известител треба да им го претстави предметот на своите колеги. Потоа се отвора јавна дискусија, по што следува подготвителна седница пред да се стигне до конечна одлука“, објасни премиерот.

ДУИ: Укинувањето на одредбите од Законот за јазиците е удар врз стабилноста и мирот

Во своето последно соопштение, ДУИ изрази остар став за можноста за укинување на одредени одредби од Законот за јазиците. Според партијата, таквиот потег би имал далекусежни последици врз стабилноста и безбедноста на државата.

  • „Укинувањето на која било одредба од Законот за употреба на јазиците не е само обично правно прашање, туку претставува сериозен удар врз стабилноста и мирот во државата“, се наведува во соопштението на ДУИ.