Сообраќајната полиција на СВР Скопје изрече 128 санкции и приведе едно лице за дрога во рамки на засилената акција „Безбеден сообраќај“, спроведена од 17 до 01 часот на 28/29 август.
Најголем дел од прекршоците се однесуваат на возачи на мотоцикли. Регистрирани се 94 мерки, меѓу кои 46 поради возење без заштитна кацига, 16 за управување без возачка дозвола и 17 за возење без положен испит за сообраќајни правила. Дополнително, шест мотоциклисти биле фатени без соодветна категорија, пет со истечени сообраќајни дозволи, а двајца не им дале предност на пешаци.
При проверките е уапсен Д.Љ., кај кого полициските службеници пронашле кокаин.
Акцијата не застана само кај мотоциклистите. Санкционирани се и 10 возачи на патнички и товарни возила без дозвола, две лица кои управувале под дејство на алкохол и еден возач што не застанал на даден знак „СТОП“.
Од МВР најавија дека ваквите засилени контроли ќе продолжат и во следниот период, со цел да се зголеми безбедноста на патиштата и да се спречат трагедии какви што ја одбележаа 2024 година, кога во сообраќајни несреќи загинаа 142 лица.