ПОТПИШАН МЕМОРАНДУМ СО ФРАНЦУСКА ПОДДРШКА: Ќе се унапредува пристапот до еколошката правда

Институциите ќе соработуваат за подобар пристап до еколошката правда

Во Делегацијата на Европската Унија во Скопје денеска беше потпишан Меморандум за разбирање за спроведување на проектот „Конвергенција на климатската и еколошката правда“ (CEJ Convergence). Документот ја утврдува соработката меѓу Министерството за животна средина и просторно планирање, Министерството за правда и француските партнери во реализацијата на проектот.

Меморандумот го потпишаа заменик-министерката за животна средина и просторно планирање Ане Лашкоска, амбасадорот на Франција во земјава Кристоф Ле Риголер и министерот за правда Игор Филков.

Според соопштението на Министерството за животна средина и просторно планирање, документот ги дефинира рамката и начините на соработка меѓу институциите, со цел да се унапреди пристапот до еколошката правда, да се зајакне учеството на јавноста во процесите на одлучување поврзани со животната средина и да се поддржи поефикасна примена на еколошкото законодавство во согласност со европските стандарди.

Заштитата на животната средина и владеењето на правото се поврзани

Лашкоска во своето обраќање посочила дека заштитата на животната средина и владеењето на правото се тесно поврзани области, кои бараат засилена институционална соработка и партнерство со меѓународните чинители.

„Со потпишувањето на меморандумот се создава основа за продлабочување на соработката со француските и европските партнери и за понатамошно усогласување со европското законодавство и практики во областа. Ова е важен чекор во исполнувањето на обврските од европската агенда и во зајакнувањето на владеењето на правото, како клучен сегмент од процесот на пристапување кон ЕУ“, изјави Лашкоска.

Таа додаде дека проектот треба да придонесе за поголема транспарентност и ефикасност на системот. Според неа, граѓаните ќе имаат полесен пристап до механизмите за заштита на нивните права во областа на животната средина, како и поголеми можности за учество во донесувањето одлуки.

Проектот е дел од реформите во рамки на Поглавјето 27 – Животна средина и климатски промени. Неговата цел е зајакнување на владеењето на правото и демократското учество во процесот на креирање јавни политики.