Пожарот во прилепскиот дел на Мариово, кој синоќа зафати делови од селото Чаниште, повторно се активирал денеска околу пладне поради засилениот ветер. Директорот на Дирекцијата за заштита и спасување, Стојанче Ангелов, информирал дека огнената линија во моментов е долга околу 20 километри и се протега од течението на Црна Река до врвот Маргаро.
Ангажирани пожарникари и доброволци
На терен се прилепските пожарникари и тимови на ДЗС составени од доброволци од Битола, а дополнително биле ангажирани и доброволци од Кочани и Виница. Главен приоритет во текот на ноќта е заштитата на селото Крушевица, кое се наоѓа на неколку километри од пожарот.
Ветерот и сувата трева ја отежнуваат интервенцијата
Гаснењето го отежнуваат високата сува трева и постојаниот ветер. Во акцијата биле вклучени и „ер трактори“ на ДЗС, кои успеале да прекинат дел од огнената линија и значително да го намалат делот што го загрозувал блискиот манастир и селото. Ангелов посочил дека пожарот во моментов е најголем во Македонија.
Изгорените куќи биле напуштени
Во однос на последиците во Чаниште, Ангелов појаснил дека куќите што изгореле синоќа биле одамна напуштени. Според него, не изгорела ниту една куќа во која активно живееле луѓе, а десетината жители на селото се вратиле во своите домови по стресот што го преживеале. Сепак, постои можност да е изгорена и некоја куќа што сопствениците ја користеле како викендичка или за повремен престој.