Куба доби испорака на сурова нафта по тримесечен прекин, откако руски танкер со околу 100.000 тони пристигна на островот, во услови на сериозна енергетска криза.
Станува збор за танкерот „Анатолиј Колодкин“, чиј пристигнување го соопшти руското Министерство за транспорт, пренесено од агенцијата Интерфакс.
Се очекува нафтата да биде истоварена во пристаништето Матанзас, додека податоците за поморскиот сообраќај претходно покажуваа дека бродот се движел долж северниот брег на Куба.
Испораката доаѓа во период кога земјата се соочува со недостиг на енергенси, откако три месеци не примила ниту еден танкер со нафта. Состојбата доведе до рестрикции и чести прекини на електричната енергија во државата со околу 10 милиони жители.
Дополнителен притисок создадоа и санкциите, откако САД го прекинаа извозот на венецуелска нафта кон Куба, што ја влоши енергетската состојба.
Во меѓувреме, американскиот претседател Доналд Трамп сигнализираше промена на ставот, изјавувајќи дека нема проблем со тоа други земји да испорачуваат нафта на Куба.
Кубанските власти предупредуваат дека кризата има директни последици врз здравствениот систем, со зголемен ризик за пациентите, особено за оние со тешки заболувања.