СЕ ПОВЕЌЕ ЖЕНИ ВО ПОЛИТИКАТА: Македонија над просекот на ЕУ со 37,5% пратенички

Евростат: Сè повеќе жени во законодавните и извршните тела на ЕУ и во Македонија

Во 2025 година, жените држеа 33,6% од местата во националните парламенти низ Европската Унија, што претставува зголемување од 5,4 процентни поени во споредба со 2015 година. Во македонскиот парламент учеството на жените достигна 37,5%, што е раст од 3,4 процентни поени во однос на 2015 година, покажуваат податоците на Евростат.

Најголем удел на жени во парламентите имаат Финска (46,0%), Шведска (44,8%) и Данска (44,7%), додека Кипар (14,3%), Унгарија (15,6%) и Романија (22,0%) се на дното на листата.

Според Евростат, во споредба со 2015 година, сите земји од ЕУ забележале раст на учеството на жените во парламентите, освен Германија, која регистрирала пад од 3,5 п.п. Најголеми зголемувања имаат Летонија (+19,0 п.п.), Малта (+14,8 п.п.), Франција (+10,9 п.п.) и Чешка (+10,6 п.п.).

Учеството на жени во влади и извршни тела

Жените, исто така, држат 31,9% од местата во националните влади на ЕУ, што претставува раст од 4,2 процентни поени во споредба со 2015 година. Во Македонија, учеството на жените во владата достигна 12,5%, зголемување од 2,5 процентни поени во однос на 2015 година.

Највисоко учество има Финска со 60% жени во владата, додека во Шведска е постигнат паритет (50%), а во Франција речиси половина од членовите на владата се жени (48,6%). На спротивната страна, Унгарија нема жени во својата национална влада, Романија има само 10,5%, а Чешка 11,8%.

Во повеќето земји од ЕУ учеството на жените во владите расте. Финска забележа најголем раст (+26,7 п.п.), следена од Литванија (+20,4 п.п.) и Естонија (+17,5 п.п.). Намалувања се регистрирани во шест земји: Романија (-24,5 п.п.), Словенија (-7,7 п.п.), Чешка (-5,8 п.п.), Холандија (-4,2 п.п.), Белгија (-1,1 п.п.) и Полска (-0,8 п.п.).