Земјотрес со интензитет од 6,6 степени според Рихтеровата скала рано утринава ги погоди југозападниот и западниот дел на Јапонија, а повеќе од 10 лица се повредени. Локалните власти и Јапонската метеоролошка опсерваторија соопштија дека земјотресот не предизвикал цунами.
Епицентарот на земјотресот бил во Тихиот Океан во областа покрај брегот на Јапонија, каде според анализи во иднина може да се очекува голем земјотрес проследен со цунами, јавија јапонските медиуми. Денешниот земјотрес се случи во 01.08 часот по локално време, а епицентарот е на длабочина од 45 километри во близина на брегот на островот Кјушу.
Шест лица се повредени во градот Оита, повеќето полесно, соопшти локалната самоуправа, во Мијазаки полицијата потврдила четворица повредени, а повредени има и во префектурите Сага и Кумамото на островот Кјушу.