Од понеделник сите ученици и студенти кои се „самотестираат“ за да можат да посетуваат настава, тоа во иднина наместо еднаш ќе треба да го прават два пати неделно. Дополнително, од понеделник се воведуваат почести редовни задолжителни тестирања во здравствените и социјалните установи, а маски ќе треба да носат и вакцинираните, доколку се во директен контакт со други лица.

–Епидемиолошката слика е лоша, се движиме кон најлошата состојба во епидемијата досега. Доколку ситуацијата не се промени и ако бројот на лица хоспитализирани на интензивна нега поради Ковид-19 се зголеми на 160 до 180 (во моментов 133), тоа би значело можно затворање на делови од општествениот живот – изјави министерот за здравство Јанез Поклукар.

Поклукар предупредува дека со тренд од 3.000 или 4.000 новозаразени дневно, ова e последен момент за „да се спречи Бергамо и колапс на здравствениот систем“.

Шефицата на владиниот експертски тим за Ковид-19, Матеја Логар, изјави дека е можно како последна мерка да се овозможи работа и слободно движење само за оние кои се вакцинирани против Ковид-19 или кои оздравеле и имаат имунитет, како и воведување онлајн часови или задолжително тестирање за сите ученици и студенти.

Поради тешката состојба и приливот на нови пациенти, најавено е дека ќе бидат отворени уште две болници за пациенти со Ковид, па од следната недела ќе ги има 15.

Словенечкиот министер за економија, Здравко Почивалшек, најави остри мерки против оние кои не ги почитуваат антиепидемиските правила, откако во последните 24 часа беа потврдени над 3.100 новозаразени лица со Ковид-19, што е втора по големина бројка годинава.

Сопствениците на локали ќе треба да ги контролираат ковид-пропусниците на посетителите, а доколку одбијат да ги покажат или да се идентификуваат, да им се забрани влезот, во спротивно тие ќе бидат одговорни.

–Доколку е потребно, ќе ги затвориме во согласност со законот оние локали што не ги контролираат посетителите – изјави Почивалшек.

Според него, Владата повеќе не смее да ги игнорира високите бројки кои покажуваат дека епидемијата е во пораст.

-Доста е со изговори, ако не престанеме, следи целосно затворање – додаде Почивалшек.

Владата соопшти дека во последните 24 часа имало 3.166 нови инфекции, што е голем пораст на бројот на заразени во споредба со пред една недела, кога беа регистрирани 2.145.

Досега во Словенија се регистрирани повеќе од 3.000 новозаразени само на 5 јануари, кога имало 3.428, а загрижувачки е растечкиот удел на позитивни тестови – во последните 24 часа имало 38,1 отсто.

Во словенечките болници во моментов има 526 пациенти со корона вирус, од кои 133 се на одделенија за интензивна нега, а за 24 часа имало девет смртни случаи од последиците од Ковид-19, соопшти претходно Министерството за здравство.

Во Словенија од септември на работа можат да одат само лицата кои имаат потврда дека се вакцинирани или прележале корона вирус, а ковид пропусниците се бараат и во јавниот превоз, за влез во трговските центри и слично.

Само 53 отсто од населението е вакцинирано против Ковид-19.