Мултинационалниот гигант за трговија со енергенси и суровини „Трафигура“, кој истовремено е и мнозински сопственик на концесијата за рудникот за бакар „Иловица – Штука“, склучи финансиски договор за кредит од 1,5 милијарди американски долари. Договорот се реализира со гаранција директно од Сојузна Република Германија. Главната намена на овие финансиски средства е обезбедување непречено и сигурно снабдување со природен гас за германскиот пазар.
Германската држава преку оваа финансиска рамка ја зацврстува долгорочната сигурност на националниот енергетски систем. Во време на геополитички предизвици и нестабилност на енергетските текови, Берлин се потпира врз широката логистичка и трговска мрежа што ја поседува швајцарската компанија за одржување стабилност на индустријата.
Ова не претставува прва соработка меѓу официјален Берлин и корпорацијата. Во текот на 2022 година „Трафигура“ веќе обезбеди кредитна линија од три милијарди американски долари со делумна гаранција на германската влада, наменета за испорака на големи количества гас преку континенталната инфраструктура. Дополнително, во февруари 2026 година беше склучен уште еден договор вреден 1,1 милијарда долари за долгорочно обезбедување на критични метали неопходни за германскиот индустриски сектор.
Договорите го потврдуваат значењето на приватната компанија како клучен снабдувачки столб за најголемата европска економија, особено во спроведувањето на технолошкиот напредок и енергетската транзиција. Корпоративната структура на „Трафигура“ од 2018 година го поседува мнозинскиот удел во „Еуромакс Ресоурцес“, друштвото со концесија за проектот „Иловица – Штука“. Седиштето на оваа компанија за Европа е лоцирано во Женева, додека глобалните операции се водат преку над 65 канцеларии во 36 земји, вклучувајќи ги центрите во Хјустон, Монтевидео и Мумбаи.